Si sa la pa in bonb, sa i rossanm bien é si lé vré méssyé lo préfé — lo nouveau — i diré li koné pliss ké li la di anou, é kan li téi di néna ankor d’ote bato pou arivé. D’ote bato i sorte oussa ? Biensir zot i sorte Sri-Lanka mé pa dirèktoman pars dopi banna l’arivé, i rakonte zot la fé in léskal mé oussa ? Maurice konm in pé la di, mé sa sé in bob. Diégo Garcia ? In baz US-GB dann bannzil Chagos.

Pou lé zoinalist Le Quotidien, sa i rossanm pliss la vérité.

Astèr dann kèl bato zot l’ariv shé nou ? Dann in bato matrikilé Sri-lanké, mé aparaman pa dann lo bato zot la sové dopi lo komansman. Sète-la lété HS kan l’ariv Diégo, mé l’avé in n’ote, matrikilé dann Sri-lanka galman é in pé moinss déglingué ké lo promyé.. Bande zanglo-amérikin la done azot in n’ot bato sri-lanké épi la di azot rotourn Sri-Lanka é zot téi vé pa pars konm zot lé dann lopozission par raporte lo gouvèrnman l’apré rode azot partou, pa pou done azot pastiye, mé pli sirman pou règ zot konte.

Sa, zot i koné é zot i koné galman sé ké néna in paké sri-lanké lé dann in prizon Diégo-Garcia déssèrtin dopi sète moi, d’ote dopi in an mé san k’lé klèr dsi zot sor a vnir. L’èr-la bande zoinalist i domande si La Franss lé konpliss avèk bande zanglé épi bande zamérikin vi k’lo préfé — l’éta lokal — i diré li koné in réyon dsu la késtyon sé a oir, mé a oir a la sours.

Astèr ni pé poze anou in ta késtyon :

Dabor inn, bande militèr GB si téi vé ranvoye azot dann Sri-Lanka noré fèrm lo zyé dsu la dirékssyon zot la pran pou kite Diégo. In moush i bouj pa san ké bande zanglo-amérikin i koné. Pé sfèr zot téi koné banna noré gingn akost issi La Rényon. Mi di sa konmsa, mé pèrsone la pa di amwin kékshoz sir la dsu… Mi vande konm mwin l’ashté.

Dézyèm zafèr, si néna 150 srilanké karsséré dann Diégo-Garcia ni pé domandé kèl shantaj bande grande puissans i fé rantre zot pou anvoye banna oussa. Sirman La Franss avèk Langlétèr zot i doi konète in réyon la dsu é sré kant mèm bon pèze dsu la ké pou oir si la tète i bouze.

Troizyèm zafèr, si banna i navig dsu zot kok pistash, sré bon konète si na poin in pé la fine noiyé dann loséan indien é pèrsone i anparl pi. In nouvo simetyèr marin, pou bande sri-lanké so foi issi ?

Pétète sa i mérite in késtyon pou poz gouvèrnman franssé é konm nou néna in bonpé dépité mi panss zot néna zot mo pou dir é nou néna mè in bon pé pèrsonalité, zot ossi, zot i pé poz la késtyon méssyé Préfé. Sak mi koné sé ké Paul Vergès noré pa rèst san parol par rapor lo malèr noute bande frèr é sèr loséan indien.

An touléka ankor in kou, nou rényoné nou lé bordé dann in n’afèr i konsèrn anou é nou na poin noute mo pou di — amoinss ké ni pran la parol. A bon ékoutèr, salu.

Justin