Na poin lontan, in moun té pa dakor avèk moin akoz moin la krétik lo prézidan La Frans. Shakènn son lopignon ! Bien sir, mi réspèk la siène : solon li, na poin in prézidan La Frans la fé travay konm Sarkozy dopi li la gingn la plas prézidan. Mi sa pa réponn ali pèrsonèl la-dsi, mé li la di in n’afèr la fé arfléshi amoin.

Li la di amoin, i fo mi arète tranp mon plime dann vèr la bil : lé bien vré, sa la pa in landroi pou tranp son plime. Soman, la bil-la, lé vré sa in poizon mortèl : si i koul pa pti dégou par pti dégou, lé riskab anpoizone aou. Sa in vilin maladi, sa ! Pou guéri sa, médsin la bèlpir i opèr par dsi opèr. Lé bien vré ! Mé la bil, sa in bon n’afèr ossi sa : i apèl sa in suc, sé dir azot koman sa lé éstra, sa lé bien nésésèr.

Alor, éstèr, si ni parl lékritir dann zournal, la bil an kantité la pa bon, donk la pa bon krétiké pou krétiké, mé la bil an dous é san sokous lé bon sa, donk in pé la krétik lé bon, mèm i fé d’bien. Mi oi par moin mèm, kan i krétik amoin, mi sèy pran prékosion, tienbo kont in pé.
Donk, tro la bil la pa bon, in pé la bil lé bien nésésèr. N’artrouvé !

Justin