Promyé pou tonm dann gob té Epimétré, lo frèr lo Promété, é li la tonm amouré fou par raport lo Pandore… Sète-la l’avé in gran gargoulète-in vaz la tère kuite téi sèrv pou ramass dolo – lété plin avèk toute kalité malèr. Li la rouvère épi tout lo bande mizèr, toute lo bande malèr la difiz partou dsi la tèr.

Néna arienk léspoir la rèste dann fon lo gargoulète é la mèm pa pèrmète bande demoune pou siporte toute lo kantité tablatire.

Mwin lé sire in pé rante zot l’apré domandé pou kossa justin i rakonte zafèr konmsa é kissa mi majine kan mi di sa : pou La Franss mi pé, mazine méssyé, jenn, intélizan, kapabe, mé sirtou o serviss bande kapitalist é bien okipé a gonf lo pla bande kak 40. Pou La rényon mi pé mazine lo parantèze Didier Robert avèk toute bande sékèl li la lèss an partan. Dann bonpé péi néna malfézan konmtoute ansanb zot i fé lo malèr l’imanité.

Final de konte si néna la mizère, la fain, lépidémi mal okipé, la guère in pépartou, lanvironeman lé si mal défandi sé par zot é pou kontinyé gonf lo pla bande kapitalis é vide la posh bande travayèr épi bande krèv la fain in pé partou dsoi la tère.mé konm i di : « Afors alé a lo kalbass i kass ! ». Alor… léspoir mézami-mézamize !

Justin