Provèrb-la i sort dann péi l’Afrik, mé la pa pou sa si li lé vré laba, li lé pa vré in pé partou dsi la tèr, é mèm isi shé nou. Solman oila, la plipar d’tan ou i di : tèl shoz lé zoli, donk ou i pans la boté lé dann sak ou l’apré rogardé é pa ditou dann out zyé, sansa dann inn épi l’ot an mèm tan. Si ou i di : « tèl shoz lé joli ! », mi pans sa i sava sirtou avèk out gou : lo gou ou néna pou la koulèr, pou la form, pou l’onb pou la limyèr. La limyèr sa kékshoz lé inportan sa pars sé la limyèr i pèrmète aou aprésyé la boté. In moun i oi pa klèr, moin lé sir lé difisil pou li romark in n’afèr zoli, sansa in n’afèr vilin pars si li kaptir pa la limyèr lé difisil pou li disting lo zoli avèk sak lé pa. Antansyon ! Sa i vé pa dir la pèrsone i pé pa aprésyé in n’afèr kisoi la form, kisoi lo mouvman, kisoi l’ansanm. Final de kont, mi kite azot avèk lo kozman : azot de oir si sé dann zyé lo spéktatèr i fo rogard la boté, sansa si la boté lé kant mèm dann sak ou l’apré rogardé. Alé ! Mi kite azot roflshi la dsi é ni artrouv pli d’van. Sipétadyé !