Mé zami, zot i koné kan i ariv in zéléksyon néna bonpé i san zot kor, I trouv zot lé bon pou shoké bon pou gagné. Antansyon mi di pa toulmoun lé parèye mé néna kant mèm désèrtin, d’apré sak mi oi, i pran po d’shanm pou pla kouvèr, makaroni pou la bouji, final de kont i fé la bou avan la plui. Mé o fète, pou kosa demoun mèm in list demoun i prézant zéléksyonn mèr.

Si i kroi la rimèr sé pars zot néna kékshoz pou gagné : kékshoz pou gagné sa sé in n’afèr i rovien dann tout konvèrsasyon pou dir toulmoun lé intérésé é pa okipé avèk lintéré zénéral.. Gagné ? Mi rapèl in kamarad téi di, kan li lété pa adzoinn mèr li téi roul an mèrsédès, é kan li lété l’adzoin li la komans roul an katrèl. An touléka sak i vé fé fortine, mi pans néna d’ot shoz pou fé ké domann la popilasyon in manda pou ète mèr sansa adzoin.

Pars si i kalkil bien, si ni rogard nout péi, ni oi li la shanj in bonpé é si li la shanj in bonpé, sé par raport néna d’moun l’amène zot zidé, la pran bann zinisyativ, la fé désèrtin projé épi sa la marshé. Moin la koni Le Port avan Paul Vergès épi apré Paul Vergès é lé zot mèr kominis, mi oi in gran shanjman pou mon par. Mi i pé dir azot sa pars dann in métyé moin la fé avan, moin la parkour komine-la, a pyé, an voitir - a shoval non !- é mi koné koman lété avan é koman lété apré é sak i di lé parèye, la pa bouzé, i fo mète zot linète an boi. An touléka, bann mèr-la la fé bonpé pou la komine é trépé pou zot-sé sak mi pans antouléka.

Astèr, ni pé domandé kosa i fo fèr ankor dann bann komine La Rényon. Kosa i fo fèr ? I fo fé travaye son matyèr griz é détak son bours zidé é ladan mi pans nou néna pou fèr : pa pou règ tout prob lèm bien sir-pars sansa pou kosa ni diré ankor nout péi lé b loké par lo sistèm néokolonyal. Sa sré pi vré sa ? An kontrèr liské zamé. Mé i pé fé avans La Rényon, o moins dsi désèrtin poin. San fé la bou avan la plui bien antandi !