« La boush in z’ami na poin sélé dési » – In kozman pou la rout

Mi pans zot i konpran bien kosa kozman-la i vé dir ? I vé dir konmsa, na poinn sogré rant z’ami. Na poin arien ké ou i kash out z’ami é ké out z’ami i kash aou. Moin pèrsonèl, mi zoué pa èk sa ! Mon zardin ségré sé mon l’éspas rézèrvé, é mi lès pa pèrsone rant la-dan. Biensir mi di plis dé-shoz in bon z’ami, in bon kamarad osinonsa in bon dalon mé na dé shoz mi di pa. Pou kosa ? Pars moin lé konmsa. Kèl sort dé shoz ? Dabor sak i onor pa moin pars na dé shoz, dann nout vi, ni èm pa fé armont lo souvnir. Pa plis moin k’in n’ot, sanm pou moin ! Poukoué ankor ? Pars moin la vi bann z ‘ami d’trant-an bril la paye inn-avèk l’ot. L’èr-la kisa i tak baro la boush inn ou bien l’ot ? Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir ké rant-rant, ni pé z’ète, tazantan, d’akor rantre nou.