Mézami konm mi di azot kozman lontan i marsh avèk sazèss é dan in monde la sazèss lé rare konm korn lapin la pa inn movèze shoze ké baze dsi bande kozman-la.

Pou kossa, pars sa la fine fé son prève dopi lontan é si li té vré avan-yèr, si li té vré yèr, zordi li sar vré é ankor pli vré domin. Pou rovni dsi noute kozman zordi, ni pé di in vré zami la poinn sogré pou son vré zami. In zami dë zour sa i fo méfyé pars talèr sa in fo zami é in fo zami lé a tou-fèr, la même fine roul aou dann son pissa san ké wi rande aou konte…

Astèr sé a shakinn dé oir sak i é dir, é sak i pé pa dir alors é a shakinn dé zizé. I paré dann listoir La Franss Montaigne avèk la Boétie té dë vré zami donk si listoir la tienbo zot nom, sa i vé dire vré zami la pa si kouran ké sa. A bon antandèr salu !

Alé ! Mi kite azot rofléshi la dsi é ni artrouv pli d’van. Sipétadyé.