Ala in kozman pou atir latansyon d’moun i pé kroir demoun lé konm i di toultan bone imèr. La pa ariv azot, kékfoi, an avoir afèr in moun la plipar d’tan li lé bone imèr é konm i di lo provèrb li lé paré pou flaté konm li lé paré pou karésé mé in zour li pète in kab sansa sinploman li lé movèz imèr, é l’èr la la boush i flate pi é la min i karèss pi. Sé bann marmaye souvan dé foi i konpran pa bann shanjman konmsa é fransh vérité zot lé in pé débousolé par lo shanjmann limèr. Lé vré la pa la boush ki komann aèl é la pa non pli la min k’i komann aèl : sé la tète é kan la tète i komann bon zafèr, la boush sansa la min i obéi, mé si èl i komann mové zafèr zot i obéi galman. É pou sa, nou na intéré rofléshi dsi nout provèrb moin la mark an-o la. I fo ni di shakinn rant nou néna nout bon zour épi néna nout mové zour mé lé zot, an zénéral, lé pou arien la-dan é zot lé pa la pou siport nout mové manyèr kan nou lé dann tan nout mové manyèr.. Alé ! Mi kite azot rofléshi la dsi é ni rotrouv pli d’van. Sipétadyé !