Lakey lo sit > Chroniques > Oté
« La boush lé bète, lo dan lé bète »
In kozman pou la route
lindi 15 novanm 2021, sanm
Médame zé méssyé, la sossyété, koze èk mwin sé koze avèk in kouyon, mé sé o pyé d’lo mir k’i oi lo masson.
Mi panss zot ossi zot i koné kozman-la é sirman pa dopi yèr soir, é konm i di dopi bèl laz é bo tan. Zot la pa romarké, néna dé foi, san fétékspré, wi pète a rir alé oir la pèrsone wi rogarde la pa bézoin k’i ri ali. Pars rire parfois é in manke sharité : mi sava pa dékri in légzanp partikilyé mé mi koné ké zot ossi zot i koné dé ka konmsa. Mi rapèl mon bande kouine téi sava la boutike arienk pou ri la komèrssante pars èl l’avé in drol boush, é apré an avoir bien rigolé zot téi di : « La boush lé bète, lo dan lé bète ! ». Mi panss sé l’moune plito mé konte pa dsi mwin pou rofé lo monde.
Alé ! Mi kite azot rofléshi la dsi é ni artrouv pli d’van. Sipétadyé.
