Oté

La boutèy sé in n’afèr, sak na d’dan sé sa k’i kont pou vréman !

Justin / 10 novanm 2016

Pétète in pé va di : Justin i rabash ! Justin i di la mèm shoztoultan ! Mé si lé vré, i vo myé répété pou k’i konpran aou, plito ké dir la mantri - La pédagozi sé l’ar d’konète répète aou bien konm k’i fo. Pou kosa mi di sa ?

Pars in gran shèf blan, a s’ki paré, la di dann télé, si son kandida i gingn li va donn plis l’otonomi La Rényon. Pars Sarkozy li-mèm la di konm de koi, li v’alé dann sans Didier Robert la domandé, donk plis résponsabilité pou La Rényon dsi la késtyonn l’ékonomi. Nou la vi, na poin lontan, dann in diskour pou lo katorzyèm anivèrsèr l’otonomi Rodrig, lo prézidan konsèy réjyonal la félisite lo shèf-komisèr pou son shoi épi la roprann inn-dé poin nout mo d’ord dsi la sékirité alimantèr épi l’otonomi dann l’énèrzi.

Inn-dé poin nout mo d’ord mé pa nout vin-sink propozisyon. Pars ropran nout program par shikète, sa lé posib, mé nout program sé in konplé é i fo pa triy dodan pou détourn anou nout obzèktif pars nout obzéktif sé dévlop La Rényon épi mète in kou d’aré lo sistèm néo-kolonyal. Lé bien vré : si ou i pèz dsi l’aksèlèratèr, épi dsi lo frin an mèm tan, mi oi ou lé mal parti.

Pou mon par, plis demoun va vni dsi nout poinn vizé pou vréman oplis sar bon pou nout péi, oplis nou va marsh dann diréksyon lo shanjman : in bon shanjman k’i sava dann sans nout l’intéré zénéral.

Final de kont la boutèy sé in n’afèr, mé sé sak nana dodan k’i kont pou vréman. Konmsa mi konpran la vi !