Médame zé méssyé, la sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami, mi panss zot i koné kan la nui lé anonssé. Sirtou l’ivèr i oi sa bien. Mèm komansman l’ivèr konm koméla. La natir i fèrm la boush, in pti briz i souf dousman mèm, épi dann lo syèl in pti brine i instal ti dousman.

La natir mézami, sa i manti pa, é pou fé konprande anou la nui i ariv li na poin son parèye.In moune i koné bien la natir la pa bézoin la montr pou di kél’èr i lé. Mé kissa ankor zordi i koné bien la natir ? Mi panss nou la fine pèrde in pé la kominyonj rante èl é nou.

Lé domaz !Zot i panss pa ? Mé pé s’fèr pou zot par, zot lé touzour konékté avèk la natir. I paré néna ankor d’moune konmsa. Mi lèss azot kant mèm rofléshi la dsi é sar pa d’tan gaspiyé. Ni artrouv pli d’van, sipétadyé.