Mé kossa i lé sa parlfète ?

Sa sé in péstiside la ansèrv dann la Martinik épi la Guadeloupe pou vanj konte in zinsèk i apèl lo Saranson k’i détrui bande plantassyon banane. La ansèrv sa dopi 1972 ziska 1993 alé oir laba dann l’Amérik té fine interdi ansèrv sa dopi 1976. Dan La franss sa lé défandu dopi 1990, mé la roport (in dérogassion i apèl sa) lo droi d’ansèrv ali ziska dan l’ané 1993 é mèm la vande sa an maron apré l’ané 1993.

Mé par l’fète, pou kossa la déside défande ansèrv zinséktiside-la ?

Par raporte li lé danzéré. Li anpoizone la tère ziska pou 700 zané, pou plizyèr zénérassion, lo d’ la mèr, lo bande nape dolo sou la tère, lo bande poisson lo douss, épi lo d’mèr, bande léguime. Rante 92 épi 95 % la popilassyon lé kontaminé. In pé va dévlope kansèr la prostate, bonpé marmaye i nétra pa a tèrm, épi zo kapassité kognitiv va diminyé par l’fète sa in perturbatèr andokrinien... Skandal sanitère, skandal d’éta, skandal larzan.

Kossa i fé astère ?

Astère i sava rokonète lo bande maladi par l’fète la chlordécone konm maladi proféssyonèl. Lo dékré i vien d’sorti. Mé dopi 2006 néna plizyèr prossé an kour mé opliss i sava, opliss i di lé possib déboush dsi in préskripssyon é sa sé in n’afère i mète bande zantiyé an kolèr. L’éta i parl touzour pa dédomazman é bande zavoka bande kapitalist i travaye pou ké l’afèr i tèrmine an lo d’boudin.

In propozission : akoz pa dékal la préskripssyon dsi plizyèr zané.L’assanblé nassyonal i pé pa vote in loi konmsa ? La pankor fé dé shoze konmsa. Mwin mi panss ké si.