Oté

La Coi ? Kèl COI ? Kosa li fé ? An létarji…

Justin / 31 mars 2020

JPEG - 43.6 ko

Zot i koné La Coi (commission de l’océan indien) ? Zot i koné sa sé in l’asosyasion la fé pou roganiz la kopérasyon rant bann péi lo sid-oues loséan indien. Zot i koné la dan néna La Répiblik Moris, Madégaskar, bannzil komor, La répiblik Sésèl épi in mashin i apèl La frans loséan Indien. Zot i romark kant mèm La Rényon i égzis pa ladan pars i paré sé la frans loséan indien k’i kont pou La frans, pou tout bann péi lé dann la Coi - i fé pi in ka avèk bann bourboné !

Nou nora lokazyon roparl de sa pars sanm pou moin la poin pèrsone la mète, an kontrèr d’sak Axel Gauvin la ékri dann shanté « Bato fou » kat zargano malèr épi dé vayan rémorkèr pou ral anou ziska La frans. Donk si mi rogard la zéografi, nou lé touzour dann loséan indien kosté sanm Moris, pa tro loin Magégaskar, frèr d’kèr avèk Sésèl épi Komor donk mi oi pa kisa la siprime nout droi. In kozman konmsa an pasan…

Dsi bann péi-la épi anplis La Rényon avèk Mayotte, néna in ménas grav i pèz. La plipar rant nou nou lé ménasé par lo corona virus é pa zordi mé la vag Tsunami i sava – si i trouv pa in bon répons-balèye anou. Donk lo pli pti zafèr téi doi fé, lété réinir la COI pou sèye trouv in manyèr pou fé fas sak i sava ariv anou. La pa arienk pou zé dé zil la fé la COI. An touléka sé in n’afèr ké mi kroi !

Lé sir si l’avé aksèp fé l’indyanoséanité, si lo lindyanoséanité l’avé bien roganiz la kopérasyon avèk bann gran péi loséan indien konm La Chine, konm L’Inde épi d’ot ankor, konm La frans si i vé, é si lindyanoséanité l’avé son volonté politik moin lé sir noré gingn prévoir épi roganiz la ripost é nou nora pa rète la pou plèr shakinn dann son koin an atandan la vag i roul anou inn dsi l’ot. Mé oila la Coi la pa bouzé é ni koné lo péril i sava débark dsi nou, toudinkou, pti lanp pti lanp konm la vag kan sa i mont. Koman nou va réazi ? Konm dabitid shakinn dann son koin avèk la kopérasyon :
Inn va kriye La chine, l’ot va kriye l’Ind, l’ot va kriye La frans, l’ot ankor va bril bann kwasa-kwasa épi va domann demoun dénons azot inn-l’ot… Bin la Coi alor ? Sa na poinn vi sa, sa lé an létarzi sa, sa i ansèrv près pa arien, sa na poin la volonté politik-é sansa, lé pa posib fé arien, zéro la gosh in shif.