Oté

La démokrasi, in sistème inparfé

mé mwin mové ké la diktatir d’éta sourir an transh papaye

Justin / 4 févrié 2021

Opliss i sava, opliss mwin néna konm linprésyon, dsi la késtyonn kovid, néna in pé dopi komansman l’apré balade anou, fé prann anou po d’shanm pou pla kouvèr, makaroni pou la bouji. An touléka, si néna in domenn la démokrasi i done l’èr èl i boite sé dann domène la santé.

JPEG - 43.6 ko

Lo malade li mèm i koné pa koman l’apré trète ali, son famiy lé dann van , li l’apré domann ali si li rant bien droite é talèr li rosort pa lo dé pyé par d’van. Souvan in n’afèr k’i ariv mé konm ou na poin priz dsi out santé, i pé ariv aou konm amwin, ni pé artrouv anou lot koté lo mir la vi san konprann koman nou la fé pou ariv la .

Mi ansouvien in zour, in famiy amwin la tonm malade, é li la artrouv ali dann in shanm lopital asèptizé, abiyé konm in moun I travaye dann santral nikléèr, é li la pass in sèrtin tan-la. Aprésa li la rotourn dann lo mond toulmoun é kan I domann ali : kossa la fé aou ? Kossa ou l’avé ?Ou té malade toulbon ? Li té i répond sinploman li koné pa.I paré dann tan li l’avé fé la guèr é kom li di, li fé konfyanss son shèf.

Zordi la paz lé tourné, é li la fine kite nout mond pou alé l’ot koté... Toutfasson, dizon sa in maladi individyèl mé kan sé in lépidémi, sansa in pandémi, la pa parèye. Sirtou pou nou k’i viv dann in koléktivité lé si loin par rapor La franss.-san pouvoir, san résponsabilité-zot i pé douté ké nou lé dann fénoir lo pli konplé é sé pou sa, ké finaldekont, demoun i panss zot lé baladé tor-an-travèr é zot i fini par fé toute ator-an-travèr.

Mi di pa ké sé in bon afèr, mé mi panss si lotorité i azi konmsa anvèr nou, in rézilta konm ni koné la pa tro étonan... La démokrasi , in sistèm lé pa parfé, mé lé défoi mwin mové k’inn sèrtène diktatir d’éta mèm pratiké avèk in sourir an transh papaye.