Zistoman dann in radyo souvan défoi lo l’aprémidi néna in lanimatèr épi son bann kamarade i koz avèk li dann téléfone pou dir gouvèrnman na rézon é lo métode li la pran i done ali ankor pliss rézon : sirtou toush pa bann ultra-rish é ponkssyone lo pèp.

Bann propozission la gosh i fé, pou zot, sa lé énorm an shif mé sa lé pa réaliss. In taks dsi bann iltra-rish i pé pèrmète léta d’ratrape vin milyar mé léta i vé pa sa li, pars sé bann ultra-rish solon li k’i fé tourn la mashine- la pa lo sossyal i fé tourn la mashine é sé pou sa gouvèrnman va rabote sink milyar dsi li pa pli loin ké l’ané k ‘i vien. Aprésa si la fine gingn lo gou, i fo kontinyé.

Dopi Macron lé o pouvoir gouvèrnman la kado bann patron pliss dé san milyar mé antanssion i fé sa an konfyanss, i rogarde pa si sa lé bien sansa mal itilizé. I rogarde pa non pli si lo bann z’ède té bien sansa mal siblé antouléka konm i di, doné sé doné, roprann sé volé. Sof pou lo pèp pars li, li doi rann dé konte. Lénormal pars li lé pa dan la ote li !

... In pé i panss sé pou gonf in pé lanploi bann franssé ! Sak i vé i kroir sa, li kroi mé sé plito pou gonf lo pla bann profi kapitaliss é pa pliss ké sa.

Astèr kossa i sava arivé ? moi d’séktanm i komanss vote lo bidzé é lo program zékonomi sar dann prozé-la. I parl d’inn mossion d’sansir dovan lo parlman mé atandon. Ki vivra verra é an atandan gouvèrnman La franss v’alé konm dabitide konm la boul karé dsi la tab plate.

A bon antandèr salu !