Lo zéro sé po ladministrasyon, aprè na 19 kandida outremèr po lé zéropéèn 2014 ; oui koné rogard bann pano la méri, dan mon vil na 10 réktang, anfin 11 ék lo zéro ; normalman bann méri i doi razout dé troi pano po ariv 19, anfin 20 ék lo zéro !
A moin moin lé pa an avans, dan 6 zour i vot ! Mé bayoun lé vré la di zéléksyon éropéén i pasione pa la foul ! Minm bann pano éléktoral ( éléktoro an fransé), ti kroi na bon pé lafis ; moin la fine voir 3 ou 4 ! Lé zot ? Ou sa i lé ?Ki sa i lé ?

A nou nout tèt de lis sé in Rényoné : lé zot pé tèt séd moun déor ?
Moin tapo rogard dé troi non si dot lis si Internèt ; sak i di « la Frans dabor » dan nout téritoir, la na in problinm ; moin mi diré la Rényon dabor ou loutremèr dabor ; koué la Frans dabor !?
Sirtou kan oui koné koué nana andsou dsa ; dot épok la tié domoun po slogan konm sa…
Rasial, antisémitik, la ras sipérièr, la ras infèrièr ? Ki kalité démokrasi ? Ki kalité républik ?
Mi arviin si lé 19 lis : dawar nana tout variant lékstrinm gos, radikal do gos, santro gos, milié (sant, konm foot-ball),sant droit, droit(kél diférans ?)-zot i rapèl répiblikin indépandan ? A tout lé variant droit-la i plisir non dan listwar, UDR, RPR, UMP, MODEM.
La gos té pa an rés ; PCF, PS, PSU, FG, Trotskis.

Nou la fine voir « parti chas é pèch », ékolozis, indépandantis, otonomis…
Bon brèf na po soizi, réflési bien kél ou vé voté ; pans dabor out bann konpatriot ék sak i rosanm a ou,sé sa out parti.
Atansyon moin la pa di parti pri, mé prèsk.
La di a ou mèt out lafis niméro 3 !

Justin