Nana la kozé, moin la antandi,apré moin la vi in gran montaz foto si lo prémié paz in zournal ; 3, 4 zonm politik la fé zistwar pa klèr dann rokritman po Foyer Terre Rouge Sinpièr.

Anfin zot lé konseyé zénéral, i paré zot la fé préférans po do moun i vot po zot. Bon nana lo mèr Lantrédé, inn ansiin konséyié sinlui (ou Larivièr), mé sirtou in 3inm , li lé osi dépité é li vé rant mèr tanpon lané prosinn, li apèl Jean-Jacques Vlody ; na ankor in fonksyonèr lasanblé départmantal, mé dizon, lélu lé pli responsab lanployié kantminm !

Persone la pi di ariin dépi la dékouv lo potoroz ; zot na intéré fil dousman, konm di lot, pa antrav lo travay la Zistis !
Persone sof… lo dépité ki vé an plis devnir mèr !

Fo konprann, li san pi son zèl ; son parti lé o pouvoir an Frans, donk dawar li san li pli for po sa ; protézé ? Bann kouroi pariziin i mèt a li an mouvman… zot fine voir in moulin mayi tourné ; ou na in motèr é pi bonpé kouroi, pouli, bann gro ron, bann pli pti, i tourn pa tout minm vitès.. ; par isi, i donn mayi normal po fé kui, par la ti giny mayi soso ; dan lot sak, i tonm ti son po fé gato lanmsime.
Isi lo motèr lé an Frans ; sé laba ki désid si ni vé soso, ti son , ou mayi normal.

Ouala k JJV i atak Nassimah Dindar a koz el lé prézidant ! Oté, Nassimah té dérièr toué kan toué tapré fé ton dosié po ton bann kamarad sosialis po li giny lanploi ! Favoritism ! Elu de la NATION ? OU NA POIN LO DROI ! Tout domoun la bozoin travay ; ou koné tout la povreté nana isi, a koz ti fé profite sertin pas lé zot !

La di a toué ti sra poursuivi par la Zistis ; kour pa ; alé konm ti vé, va trap a toué !

Justin