Banna i di 80% la popilassion na point papié fransé. I ve dire 80% zétranzé. Si sa lé vré, koman zot lariv là ? Sa lé in travay band trafikan dann l’administration Mayotte. Koman zot i vive ? Kisa na lintéré fé travay a zot po la po patate ? San band moun-là , l’ékonomi Mayotte lé mor. Ban Maoré néna papier fransé, na lontan zot fine glisse en France ou La Réunion.

Dan le 20% restan, i di néna papier fransé, néna bonpé Réyoné ek zorey. Mi espère Réyoné-colonisé lé solidaire avec lo band victimes.

La télé y fé bonpé kominikassion pou essaye éfass listoire. Mé konm y marse pa tro, ni lo lopérassion, ni lo propagande, ben la télé kolonial y vien an ranfor.

Dann la somène, la télé la passe in gran dokimantère dessi Bob Dénard. Sé in boug lafé 3 ou 4 kou d’État aux Comores, li la fé tué 3 Présidans. Li la mem renverse lo présidan soizi par lo pèp Comores, pou installe son komandemant.

Mé kroi pa lo dokimantère va présente à li konm in kriminel, non va ! Su lo site lo télé lé ékri : « Bob Dénard, Chef de guerre charismatique, flamboyant, hors du commun, …. ».

A wi !! Y fé roul la bouche. Oté koman y pé falsifié listoire kom sa té ?

A bon antandèr sali.