Shakenn nana parashut doré li niabou améné. Pou déssèrtin, i kont par milion lëro, mem si zot la pa gingn fé rien pou fé marsh lantrëpriz zot lété patron. I fo dir larjan i apèl larjan. Déssèrtin lé dépïté lasanblé nasional, solman zot lé riskab èt dan la "dépitasion" proshin zéléksion, si bann zéléktèr i anvoy azot dingué. Donkalor, zot va gingn in shomaj pou in long dïré, sink an... sof si zot i gingn in travay.

Nou ni koné plïto, dan nout famy, an parmi nout bann dalon, sansa dmoun nï kroiz konm-si konm-sa demoun nana in parashït la tol rouyé : in pti-guiguine sédik, in pti rëtrèt, sansa RMI : nana bonpé dmoun i gingn sa issi. Sa dmoun lé mal konsidéré mem, sa. Kossa i di pa dsï zot ! Zot lé parès, zot i travay an misouk, zot min lé long, zot na poil dan lamin, zot i kontant zot mizèr patati-patata, ésétéra-la ké lo ra.

Oubli pa solman, bann vaza i préfèr banna i gingn in pti soso épï i vien pa agas azot dann zot lantrëpriz. L’Eta-la-droit lé dakor sanm sa, vik avèk bann vaza, zot lé konm lo zo avèk la shèr. Inn i soutien l’ot.

Justin