Kan i parl lo ka la famiy Nourdine, i poz in drol problèm lo droi : sa lé vré ! Banna i sort Komor, épi zot la gingn in lotorizasion pou alé Mayotte épi pou arête la-ba in koup de tan. Solman, pou l’administrasion, l’otorizasion pou arète Mayotte i donn pa lo droi vnir La Rénion, pou résté... Donkalor, pou l’administrasion, la famiy Nourdine lé dan son tor.

Alor, i poz la késtion : Mayotte lé fransé, lé pa fransé ? Pou moin, Mayotte sé in koloni La Frans, mé pou in bonpé, épi ofisièlman, Mayotte lé fransé. Ni pé domann anou par koman in gouvèrnman i gingn fé in loi tor konmsa, koman i pé gingn in pèrmi d’sézour pou in bout La Frans, pa pou lo rèst. Koman i gingn kas La Frans par pti bout konm sa. Sa i tienbo pa d’bout !

Ni pé dmann anou galman si banna lé danzéré pou la sékirité, épi lékilib La Frans. I arsanm pa, kontrèr, lo mari nana diplom, li travay, li pèy son zinpo, la zistis la zamé kondane ali. Bann zanfan i sava lékol, é moin lé pliské sir zot i roul z’ot kréol épi z’ot fransé. Lo famiy Nourdine lé konm ninport ékèl famiy... Bin alor, akoz i mète azot déor ? Di pa moin sé akoz i mank azot la koulèr. I prétan demoun la pi rasis zordi !

Justin