Médam, mésyé, la sosyété, mi pans, sa in patoi nout tout i koné. An touléka tout sak an parmi nou i viv in pé dan la natir, i kotoiye aèl, épi i konsidèr aèl konm in sours de vi, in sours pou done anou in siplémn la vi. An parlann fèye sonj, moin la fine pass in bonpé d’tan pou bien rogard azot épi pou oir koman lo la pli i éklate an pti goutlète épi i disparète dsi son vèrni pars fransh vérité i oi bien néna in sort vèrni dsi bann fèye-la . A ! Si bann shèrchèr lété kapab tir pari sète afèr-la, kansréti pou linj, noré té valab port in linz konmsa épi alé dsou la plui san k’i mouye aou, épizapré ou i fé konm kanar ou i sokouye in kou é ou lé parti-la pa sa mèm i apèl la biotéknolozi la ? A ! La natir na poin arien d’ myé k’sa… Konm sé in kozman, é dizon in règ de vi, ni konpran bien sak sa i vé dir : sirtou pa lèss bann la-di-la fé l’moun mète out moral an bèrn, afayi aou, démoraliz aou. Fé konm fèye sonz : kan lé fini lé fini. Alé ! mi kite azot rofléshi la dsi é ni artrouv pli d’van. Sipétadyé !