Mé si i fo réponde la késtyon pou kossa i fé in fète dé mère mi panss mwin lé riskab ète dan la difikilté. Sof ké sa sé in léritaz Maréchal Pétain sak l’avé done La franss pou doviz « Travaye, Famiye, Patri » mé apré la guèr Vincent Auriol- in gran politik dann tan-la- la désside ropran fète-la é dopi ni kontinyé.

Astèr si mwin l’avé in lésplikassion pèrsonèl pou doné dann sète afèr-la, dabor inn mi oiré mon ka pèrsonèl épi la rolassion mwin l’avé avèk mon momon dann tan mwin lété pti pars d’apré mwin sé kant ou lé pti ké wi apréssyé la prézanss in momon.Mé pou in momon ou lé pti toultan... Mon momon lété métrèss d’ékol é èl téi diriz in lékol primèr la-o Boi d’Nèf Sind-Ni, in landroi demoune lété pov dann lo tan d’avan.

Alor, mon momon k’lété galman mon métrèss lékol, téi doi, anpliss okipe anou, okipe son bande zélèv é malorozman néglij aèl bonpé pars d’apré mwin noute toute néna in kapital l’amour é si ni dépanss tro pou ème lé zot, i rèss pi assé pou nou ème anou in pé. Wala pou kossa pétète la désside fé in fète épi l’apèl sa la fète bande momon.

A bon antandèr, salu.