Pars, kèl fète kan i anonss bande vyolanss i kass la vi in bonpé konmsa é La somenn l’avé komans par in kolok dsi la vyolanss inter familyal é la plipar d’tan sé la vyolanss dsi bande madam épi la vyolanss konte bande zanfan é tazantan téi anparl ankor la vyolanss konte bande demoune i rante pa dann in soi-dizan normalité, épi mèm la vyolanss konte demoune dann la frazilité.

Alor, kèl kalité fète sa ?

Kan la plipar d’tan sé lo travaye demoune déor lé valorizé o moinss pou katrovin dis pour san é pou in pti pé lo travaye bande rényoné ; alor fransh vérité mézami, nou noré bien émé dépanss noute larzan pou la fète dé mèr si sa l’avé pou rézilta d’ranfors l’anploi bande rényoné épi bande rényonèz, si sa l’avé konm rézilta d’ranfors bande zantropriz i done travaye bande rényonèz épi bande rényoné é l’onètté konm la franshiz i obliz anou dir la pa sa sof dann in pti franj minoritèr.

Alors, kèl fète sa ?

Kan la vyolanss konte bande fam lé ankor riskab goumanté par toute bande fète , déssèrtène in pé sovaz, la roganiz dimansh. Si mwin lété in madam, mi diré mi yèm bien fé la fète si mwin lé dann la sékirité, si mon bande zanfan i pé dir trankilman zot i yème amwin, si aprésa zot lé dann la sékirité alimantèr, la réissite dan lékol, é la konsidérassion dann la sossyété. Ziska zordi la pa sa pou san pour san é lé bien domaz.

Mézami mwin lé pou la fète dé mère, si sa i agrav pa lo ka bande momon épi bande zanfan ; An ka kontrèr soiouplé, parl pa mwin dsa sof ; si ni trouv koman sa i pé alé dann sanss mi souète an-o la.

A bon antandèr, salu

Justin