Mé zami, souvan dé foi, mi yèmré i pran lé shoz o sèryé. I pé pa plézant dsi tout zafèr kant mèm, tourn tout a la rigolad. Néna lo sakré épi lo sèryé, ébin sa, sanm pou moin, i pé pa tourna la gaskonade. A moins ké ni pran pa nou o séryé, ni préfèr fé rir d’nou plito ké mète anou in pé anlèr.

Néna poin lontan in gran lémisyon téi di : Koman i rokonète in rényoné, kisoi son zong lé gran, kisoi li néna onz doi d’min... Moin la fine anparl sa mé mi pans ak la poz késtyon konmsa, sa i rolèv pa li. Astèr si li di koman i rokoné in zorèye ? Mé mi sava pa di in n’afèr konmsa pars la bou konm i di i tonm dsi moin épi dsi mon zoinal Témoignaz. Mi vé pa la bou ni pou mwin, ni pou li.

Pwin final avèk sa ! Astèr mi kalkil in kou dann nout kalandriyé néna désèrtènn fète i kont bonpé pou nou, kisoi bann fète komèrsyal, kisoi bann fète kiltirèl, kisoi d’ot ankor. Antansyon mi di pa i fo fé la mine matin o soir, fé konmsi ou l’asiz dsi in boi pointi, i pé rir, i pé sourir, é tazantan mèm nout dovoir sé d’koz sèryèzman. Yèr té la fète la lang épi a kiltir kréol. Sa lé inportan sa ! I fo ni done anou in tan pou rofléshi dsi l’afèr bien konm k’i fo mé moin la ékout in bonpé radyo, lété arienk apré fé la galéjade konm bann marséyé i di. Lé vré moin la antann galman bann zésplikasyon sèryé par bann moun sèryé é sa la fé plézir amoin.

Kisa téi di ankor mi dépèsh amoin pou ri pou tout zafèr pars moin la pèr an pléré ? Sa i doi z’ète in moun konm La fontaine sa mé alon pass la dsi, mé mi partaz pa poinnvizé-la san pour san. Ri in pé tazantan lé bon pou la santé-ié dékontrak bann misk zigomatik-, mé ri toultan é demoun va pans ou néna in, gronouy l’apré s digdig aou dan la tète… i pé di osi in kankrola dann plafon... Mi souvien néna dé trwa somenn moin la parti oir in pyèss komik an kréol rényoné. Mi pé jir azot par moman moin té tris mé moin la mazine final de kont té moin lété bonzour tristèss é sak téi ri zot la bien soulaz zot sousi. Sa sé in n’afèr k’i fo fèr tazantan.

Alé, mi kal in kou landroi moin l’arivé é sinploman ni rodi, rant nou, la fète la lang épi la kiltir kréol sa in gayar fète sa ! L’ané proshène ni romète sa !