Si ou i suiv in pé listoir limanité, ou i an apèrsoi tazantan in pé i anons la fin-di-mond. Pou kossa ?
Sa lé dir pou konète mé sirman pars limanité, momandoné, i koné pi dan kèl diréksyon li va déviré...

In pé i di limanité lé an kriz. L’an mil, la-ba dann loksidan, téi doi ète la fin-di-mond é lo bann farsèr té i anons sa ; demoun té i apèl azot bann milénaris.
Aprésa, nana ankor in bon pé l’anons lo mèm z’afèr, lo mèm kouyonad...
So kou issi, i di konmsa, la fin-di-mond i tonm lo 21 désanm 2012.

Moin lé kontan, pars la Fèt la Libèrté, nout Fèt Kaf, i tonm lo vin désanm ; donkalor, nou va gingn fèt ali ankor in kou !
Poitan lé vré k’lo mond i marsh an sharèt shaviré : Agard shomaz koman i goumant ! Bann maladi nouvèl koman i ariv ! Koman lé dir pou défann lanvironeman !
Agard ankor koman in paké d’moun lé pa byin dann z’ot tèt !

Alors, in pé dmoun, la tèt piké, sansa léspri anfarlangué, sinon i di sa pou farsé, i anons la fin-di-mond épi in bon pé i gingn la krintiv, i viv dan la frous, i oubli zot vré problèm pou kour déyèr, sak in pé i apèl in shimèr. Pars lé vré lo mond i gingn ar pa règ tousa problèm èk bann vyé solisyon i pass pi ! Vyé klé i rouv pa nouvo sérir !

Ala pou kossa, moin pèrsonèl, mi kroi pa so zistoir la fin-di-mond. Mé sak moin lé sir sé plito k’ni sava konèt la fin-d’in-mond : in vyé mond !

Justin