D’apré désèrtin, lo kalandriyé maya la program la fin di mond pou lo vint-é-in désanm, sansa pou lo sis désanm. Kèl désanm ? Sèt ané bien sir, pa dan mil an !... Ozis, kouk i lé lo kalandriyé maya ? Bien sir, mi koné pa arien ditou la dsi. Bann Maya, sa in bann z’Indien l’Éspagn la sasine zot sivilizasion. Sé tout sak mi koné, é moin la pa anvi konèt plis ké sa. Pou koué ? Pars kan i parl la mor, moin, konm in bonpé d’moun, ni profèr kashièt déièr nout ti doi ; konm sa ni sipoz nou lé dan la sékirité. Bon ! La pa sa ! Pou koué o fèt mi parl de sa ? Pars mi antann in bonpé d’moun apré jazé dsi la fin di mond, mé mi antann pa in bonpé koz dsi lo réshofman klimatik.

Na poin lontan, la Bank mondial la di, sanm pou li, l’éshofman klimatik sar pli for ké sak ni kroi, va trap kat dégré. Sanm pou li ? Non, li baz dsi in bann kalkil savan épi dsi in bonpé l’obsèrvasion. Konm di lo kont, la pa avèk la krash li di sa ! La pa non pli in parol anlèr ! La pa non pli in kalandriyé maya ké mi koné mèm pa. Bann savan nana zouti koméla pou prévoir bann z’afèr konm sa : la font la glas, lo bann tanpératir, la romonté la mèr épi bann katastrof klimatik. Donk, l’afèr lé sérié, mé li lé pa pou zordi, bin pou domin, mèm pa pou apré domin. Pou dan sinkant-an par la ! A ! Zot i réspir ! Mé sinkant-an, sé dan pa lontan, é lo pti z’anfan i kri an sortan dann vant son momon sar bien vivan li. Fransh vérité, sinkant-an la pa long sa.

Dakor, mé kisa la fot ? La fot, sé in pé toulmoun, mé plis bann péi rish la tiliz sharbon èk pétrol an kantité épi la obliz anou pran modèl dsi zot. Si tèlman ké bann nouvo péi rish, zot osi la pran modèl la dsi : konsomé, konsomé, konsomé ! Bril sharbon, bril pétrol, bril lo gaz ! Détrui la tèr, détrui la mèr, détrui la kalité nout l’èr. Aprésa, i ranvoy anou dsi kalandriyé maya ; i di anou, la fin di mond lé programé ! Alé oir lé vré, si lo mond i kontinié marsh an défalké, si i shanj pa lé shoz. Par l’fèt, zot i koné Doha ? I paré sé l’androi la tèr ousa na lo plis gaz i fé l’éfé dsèr. Mi koné pa si sé lo méyèr l’androi pou diskit dsi lo méyèr manièr pou arèt in pé avèk l’éshofman klimatik. Pétèt banna l’apré zis koz dsi kalandriyé maya ?

 Justin