Konm lo sèl métode lavé lété la lite san la vyolanss nou la panss avèk rézon téi falé partisipe la vi démokratik. Mé dann tan-la té pli fassil dir ké fère pars tan-la lété lo tan nèrvi, lo tan la frode éléktoral, lo tan la koripssyon, lo tan la répréssion donk téi falé ramenn issi dann noute péi in vi piblik in pé démokratik.

Pétète in pé i koné pa sansa zot i rapèl pa bien mé momandoné l’avé ziska 100 kominis dann la prizon, la sézi témoignaz 47 foi, Paul Vergès lét blizé alé dann la klandèstinité, épi l’avé kamarade in partou dan la natire pars téi poursuiv bande rézistan ékan téi ariv zélékssyon lété l’èr pou akoush la momon koshon.

Dizon la ramenn in pé koman-koman in vi plizoumwin démokratik. Bande parti politik téi partissipe zélékssyon mé la diféranss avèk nou ? La différanss sé ké zélékssyon té pou nou - d’aprésak mi rapèl - in moiyin, pa ine fin. Pars la fin lété noute doub libérassion mwin la fine marke an-o la.

Pti lanp – pti lanp d’apré mwin lo moiyin la pran la plass la fin. Lidé d’la fin la pa éfass kon plèteman, mé lo moiyin : ète mèr la komine, ète dann la majorité konsèye zénéral, sansa konsèye réjyonal la vni lo bite. La réissi in pé é noute doub libérassion la éfass in pé pou ranplass par lo dévlopman, bien-être, laménazan noute téritoir, la défanss lanvironeman.

Mé konbien l’arète dsi bordaz shomin ? In ta avèk in paké, bande malémé la sossyété rényonèze. Zordi néna ankor la mizère é sa sé in nafèr nou téi vé ziska mète horlaloi. La suite, mi koné pa. Si la vi i done amwin tor, tan-myé ! si èl i done amwin rézon-kèl domaze.

Justin