Mi ansouvien, in zour, in prèt légliz katolik té apré di konmsa avèk son bann dalon, li lé dakor avèk bann zidé Parti kominis rényoné, mé li pé pa angazé dann in konba politik avèk parti-la. Biensir li l’avé son rézon. An parmi l’avé lo sobataz rant la filozofi kominis épi la rolijyon. Arzout èk sa, kan ou lé angajé a-fon dann la rolijyon katolik, épi dan légliz, lé difisil pran lo risk koup la kord avèk langajman out vi konm prèt. Moin la touzour pans, konm tout demoun, lé pli fasil suiv in kouran d’lo dann sans li koul ké armont dési.
Poitan, dan mon vi, moin la konète désèrtin prèt la rolijyon katolik, konm désèrtin prèt malbar, épi d’ot pastèr dann d’ot rolizyon ankor la angaz dan la politik avèk bann kominis. Mi pé pa dir, san problèm konsyans pars na arienk zot i pé di si zot nana, si zot l’avé, sansa si zot na poin, si zot la zamé gingn problèm konmsa. Sanm pou moin, Pèr Payet, d’apré sak li la di, d’apré sak li la fé é koman li la viv, l’avé poin problèm konsyans dési la késtyon nou l’apré an-parlé. Pèr Cardonel osi la di li l’avé poin problèm konsyans kan, dann l’ané 1968, li té i prèsh pou la révolisyon dési la baz l’Évanzil.
In zour, li lété malad, é mi ansouvien, avèk inn mon bann garson, nou la parti oir ali lopital. I diré li lété kontan d’moun té i vien oir ali, é konm l’avé in marmay, lé normal fé in ka ansanm. Li noré pi domann nouvèl lékol, léspor, mèm intérès pou savoir si lo marmay té i ékout bien son paran. Non ! Li la domann lo ga si i sava katéshis épi li la poz in késtyon, suivan lo nivo lo marmay, in késtyon dési la foi dann Zézikri. Kan lo marmay la réponn, li lété kontan, pétète pars lété lo répons li té i vé antann. L’èr-la, mi pans, moin la konpri in pti myète, pou li, son vi konm prèt, son vi konm militan, é galman konm Olivier Tienbo, lété in sèl épi mèm vi. L’avé poin bann konpartiman séparé é ralé-pousé rant lé z’inn épi lé zot. An plis ké sa, avèk la foi k’i soulèv bann montagn.

NB : Pèr Payet la gingn lo tit Zarboutan nout kiltir avèk la Réjyon, dann tan Paul Vergès lété prézidan. Sa sé in tit valab. La kiltir lé si tèlman inportan é Pèr Payet lété si tèlman in gran Rényoné. In tit pliské mérité.

Justin