Médam, Mésyé, La konpagni koz èk moin sé koz èk in kouyon mé sé o pyé d’lo mir k’i oi lo mason. Kozman mi di azot zordi sa ankor in kozman L’afrik é lo pyé d’boi sé lo baobab : par l’fète zot i koné pyé d’boi-la sa lé bandé sa si tèlman i pé ansèrv ali pou tout sort shoz, si tèlman li viv lontan – mil an sansa plis ankor d’apré sak moin la antann dir-si tèlman li lé kosto : dé foi in kaz i pé rant dodan. Mé si ni kont bien, lo bann rasine-lo sistèm rasinèr i di sa-sé par-la la fors i ariv. Sé par-la li lé akroshé avèk la tèr. Par-la galman son gard-manzé i pass pou nouri ali, la plipar d’tan. Sa sé lo sans prop ! Astèr si ni rogard lo sans figiré : nout rasine, kosa i lé ? Sé nout bann zansète. Sé zot i fé sak ni lé zordi. San zot nou sé rien ditou, avèk zot lé éné l’imanité. Zot i doi pa nou arien mé nou ni doi zot sak ni lé zordi. Alé ! Mi kite azot rofléshi la dsi é ni artrouv pli d’van. Sipétadyé.