Madam Guigou, in gran rèsponsab sosyalis, in madam byin intélizan, i sort vnir La Rényon pou amèn la kanpagn zéléksyon. D’apré moin, nana in n’afèr té apré boulvèrs aèl, alors èl la di i fo défann lo sik bétrav.
Bétrav ? Na poin sa issi... Touléka na poin bétrav i fé d’sik ansanm.
Issi, ni koné aryink bétrav i mélanz avèk ponm-dé-tèr, dé zèf, épi d’ot kalité zafèr pou fé salad. Sa lé byin bon… pou sak i èm !

Mé, si mi tronp pa, bann bétravyé, so bann gro vaza i gonf z’ot pla avèk lède l’Europ-la, nana lontan zot i rèv pran nout kota d’sik kane pou zot, pou fé l’ta avèk zot prodiksyon désik bétrav. La pa zot mèm la mète bann plantèr kane la-ba dan la Martinik épi la Gouadloup déssi la paye ? La pa zot mèm, na in pé d’tan téi fé zyé dou avèk nout kota d’sik ? Kota d’sik kane, La Rényon, konm zé te èm !

Mé, si moin nana bone mémoir — amoins mi tronp ? —, moin la zamé antann bann dirizan la Frans, kisoi droite, kisoi gosh, lèv in pé la voi, lèv kansréti lo pti doi, pou fé arète bann gro profitèr la PAC gonf zot pla konm zot l’apré fé dépi tan-é-tann zané.
Moin la zamé antann bann dirizan-la dir i fo lèss in pé pliss l’èd pou bann plantèr kane, épi donn in pé moins bann gro vaza.

Alors, kan madam Guigou i anparl sik bétrav La Rényon, lé sir èl la pa vouli dir sa. Dizon èl la fé sak i apèl in "lapsis", mé a s’ki paré, i lapsis-la, sa i ariv pa konmsa gratuitman, pou la po patat ; sa i ariv pars dann fon out kèr ou i pans pa vréman sak ou i di ! Toulmoin, out pansé lé pa issi èk nou, lé la-ba dann karo bétrav...

Alors, la foursh la langué ? Oui, mé pa solman sa...
Touléka, mi pans pa i fo prann sa aryink konm in trokaz de lang. Fransh vérité !

Justin