Mi koné pa, si konm moin zot i suiv in pé l’aktyalité la shèr é dous France, mé si zot i suiv moin lé sir zot la romark in n’afér. Kosa ? D’apré sak mi romark la France l’apré pèrd tout son bann éstar. Solman, antansion, la pa pou sak demoun i kroi, la pa pou in késtyonn zinpo ! Pa ditou ! La prèv, in pé, pa tout, la di zot i kontinyé pèy zot zinpo an France. Solman, na in n’afèr lé bizar a moins ké moin lé mal intansyoné, mé mi romark partou ousa zot i sava i pèy moins l’inpo k’an France : Monté-karlo li ! La Suisse li ! L’Amérik li ! L’Anglétèr-li ! La Belgique li ! Pou la Belgique, na mèm in kapitalis kamarad Sarko, i apèl Bolloré, la déside domann la nasyonalité péi-la, é na zis kékzour méssyé Depardieu la déside alé arès dann la Belgique, a popré in domi kilomète la frontyèr, dann in vilaz trankil vèy pa koman. I paré li lé an kolèr pars son shanpyon, lo pti prézidan Sarkozy la pèrd zéléksion.

Mi di pa zot sé in plézir pèy z’inpo. Mi vé pa dir azot sé in zouisans pèy son zinpo ! Moin lé mèm sir demoun i pans in l’Éta i pé viv san fé pèy son bann sitoiyin z’inpo, la taks é tout lo tranbleman dann zot kèr, zot i doi di zot osi si n’avé moiyin moiyéné, zot nora parti dann in péi étranj. Solman, mi kroi pa, bann péi étranj la bézoin bann ti-kolon, mèm bann moiyin kolon, mi kroi plito zot i préfèr oir aivé, bann ki-an-or. Sa i raport plis, é sa lé méyèr pou la répitasion lo péi. Zot i pans gouvèrnman Maurice lé kontan oir d’moun an pass-doi, kilot rapyésté, oki d’larjan é tout sak i s’ansui, plito ké oir arivé bann demoun lo pla bien gonflé. Mi konpran azot moin. Konm di lo patoi frékant lo shien ou i gingn lo pis, mé frékant moun bien i pé détinn in pé dsi ou.

Pou kosa mi parl Maurice ? Pars, figuir azot dopi in koup de tan i fé gran sirfas, i fé lotisman lo liks, i fé gran-gran lotèl. Zot va di amoin sa lé pa nouvo ! Mé sak lé nèv sé k’in pé la vni fé larzan La Rényon, astèr i fé z’afèr Maurice. Si tèlman ké défoi kan ou i koz avèk bann Morisien i di aou bann gran magazin, bann lotèl do liks, bann imèb an nik, sa la pa pou Morisien sa pou Rényoné, sa pou Fransé, sa pou z’Anglé. Dé foi la ont i pran aou, mèm si ou lé plito dann kan sak nana zot po d’fès dan la min, plito ké dan sak larzan i pous zot posh palto par dovan zot. Bien sir, nou na lo bann rish ké ni pé, mé sa i anpèsh pa zot plime anou, plime bann ti-kolon, é bann moiyin kolon, plime larzan piblik pou alé la-ba fé biznèss. Dé san kilomète l’asé pou oubli out patriotism rényoné. Aprésa ala ké ou i dovien in vré éstar paré pou abandone out péi. Fransh vérité !

 Justin