Kan na in n’afèr i spas dann nout réjyon lé normal sa i intérès anou. Kan na in n’afèr k’i éspas koté La Rényon, mi pans nou rényoné ni pé pa rès dsi l’bor kanal. Mé, dopi mésyé Holland lé prézidan i diré, lé pli pir ankor ké dann tan la droite. Si ni vé ète klèr, nou va di, mésyé Hollande avèk son bann i pran anou pou shifonn pyé.

Nou la vi sa dann la COI : pou La Frans lé konmsi nou téi égzis mèm pa. Moin la fine dir an romontan in pé dann l’istoir ké nout parti kominis rényonné konm lé z’ot parti progrésis l’oséan indien la fé lo fondasyon pou in l’amityé rant bann pèp. Mé kant la désid fé in l’inyon rant bann z’éta, la anvoye anou dingué konmsi nou l’avé poin nout mo pou dir dann sète afèr-la.

Dann kék zour, va rouvèr, dann Madagaskar, in gran kongré la frankofoni. Mi pans, zot konm moin, nou lé d’avi, la frankofoni sa i konsèrn anou. Mé moin la pa antann dir bann rényoné, kansréti in prézidan, sré invité pou di nout dé mo dsi sète afèr-la… Myé k’sa, konbien foi Paul Vergès la di gouvèrnman fransé, si La Frans i vé pa ète bordé, èl na intéré pou donn la frankofoni lo moiyin pou égzisté. Donk, pou moin, vi ké Paul Vergès sé in rényoné é vi ké li lété lo pli atantif dsi la késtyon La frankofoni, la Rényon li doi an avoir son plas la-dan. Sa sé in kékshoz lé évidan pou moin.

Arzout èk sa, La Rényon i pé ète in bon baz pou la frankofoni : akoz pa in gran l’inivèrsité l’oséan indien bazé shé nou, Akoz pa in gran mouvman pou dévlop la lang fransé an parmi bann péi l’oséan indien… Mé mi pé dir azot, in n’afèr konmsa i pé pa fèr san nout lang kréol : nout lang kréol rényoné sé lo bar d’fèr dann sète afèr-la.

La pa pou lo kréol i fo an avoir pèr, mé pou lo fransé pars son éstratézi lé pa bon, son tak-tik lé mové, li la poin in plan pou bataye sof difiz lo néo-kolonyalis dann l’oséan indien é sa sé in n’afèr ké va rotourn kont li.