Mésié Fillon, zot i koné kissa i lé ? Donkalor, somèn dèrnièr, li té apré bate karé dan la Corse.
Ala k’li di li lé « à la tête » in l’Éta lé an “faillite”, la i parl pou La Frans. Dabor inn, li la pa lo shèf l’Éta. Mé pass la-dsi ! Dizon li la fors dsi kékshoz likid, la mète ali dann son vir-vir... Mé La Frans dan lokisité lo sirandètman ? Soi lé vré, alor na in bout lo film nou la pa vi. Soi lé pa vré, alor li la pa, an parlan par réspé, in boug kapab ète prémyé minis, épi i fo aplik ali inn anparmi nout bann provèrb nasional ki di konmsa « Atèl in bourik avèk in kalèsh, li pran ali pou in shoval ! ».

Alon koz séryé : si na difikilté larzan, kossa i fo fé ? Dépans moin, goumante oute rovni... Moin, mi oi i fé lo kontrèr : i dépans plis pou gingn moin. Tardra, viendra, La Frans sar dann malizé pou vréman.
Moin la vi dann télé in lémission dsi in pti péï i apèl lo Nauru lé an “faillite” pou vréman. Li la si tèlman gaspiy son bann rishèss, si tèlman kont dsi larzan la mafia, zordi li gingn pi alé ni dovan, ni déyèr.
Alor, in késtion Méssié Fillon : la Frans èk lo Nauru, la pa topète morète o moin ?

Justin