Oté

La Frans i viv dann krédi ékolozik dopi samdi sink mé !

Justin / 7 mé 2018

JPEG - 43.6 ko

Si zot lé abityé konm moin rogard bann gran médya La Frankofone, si zot i ékout bann koko fromaz i sobatkoz dann bann médya-la, moin lé sir zot i doi pans La Frans sé in péi ékilibré, konm in pé i di : « dann zisté milyë » .

La prèv, li la pa an pointe dsi la késtyonn l’ékolozi-sé dann paris, l’ané 2015 la sign lo trété nout tout i koné. La Frans néna mèm in gran minis l’ékolozi i apèl hulot. La Frans la mèm fini mète in plan dsi lo tranzisyon énèrzétik. Sé dir si sak moin la di anlèr-la lé vré dé san pour san.

Poitan mi sort lir inndé paz zournal i di lo kontrèr. Solon bann zournal-la La Frans sé inn anparmi bann pli mové zélèv dsi lo poinnvizé d’la défans l’anvironeman. I paré mèm é sa sé in l’asosyasyon ékolozik la kalkilé : bann fransé i viv dsi lo do la natir dopi samdi sink mé.

Kat moi avèk in grin kla fine pasé dopi promyé zanvyé é La Frans la fine konsome la rishès ronouvlab dsi inn ané. Kan v’ariv 31 désanm èl nora fine konsome dé foiédmi son rishèss ronouvlab pou inn ané. Si toulmoun i fé konmsa pou viv lo mond noré bézoin troi tèr plito k’inn.

Sak mi sort di an-o la, i amontr la kapasité bann kapitalis épi bann gouvèrnman mèm konplis dann in péi konm La Frans : kozé, kozé, kozé mé gaspiyé, gaspiyé, gaspiyé bann rosours nout planète.

NB Si La Frans lé konmsa, koman ni lé nou ? Konbienn foi bann rosours ronouvlab La Rényon ni konsome dann in l’ané ? Par la fote nout sistasion atipik. Par la fote nout sistèm kapitaltis doublé avèk nout sitèm néokolonyal... Solman si La Frans lé pa dan l’obligasyon viv konm èl i viv, konsome konm èl i konsome, gaspiye konm èl i gaspiye, nou osi nou lé pa blizé viv konm d’ète mayé dann in trin konmsa.