Matante Zélida la ékrir Justin :
Mon shèr nové, mon spès salté,
Mi sipoz zot i doi ète kontan oir lékonomi i sava an dégréné. Di pa non, moin la fine romark azot, zot bann rouj de fon, zot lé plis kontan anons mové nouvèl ké bon nouvèl ! A, in bank la pran l’fon ? I di sa toutsuit. La goumant in z’inpo ? Vitman-vitman, i souf sa dann zorèy demoun. La droit la gingn in zanbèk par-la ? Zot lé préssé pou di sa ? Ou i vé in bon nouvèl ? Nana zan k’i ri, nana Zan k’i plèr : zot, zot sé Zan k’i plèr. Ké ou i vé, ké ou i vé pa ! É pran sa pou toué !

Justin la fé aèl pou répons :
Mon vié Matante,
La pa la météo la fote si nana siklone ! Si na mové nouvèl i fo pa di alor ? Mèm si i vo mié konète an avans pou sèy anparé ! Zordi nana konm in siklone i souf déssi lékonomi. In pé i sèy rod in parad, in pé i fé konm si lavé poin danzé... Gouvèrnman la Frans la pa vi arien arivé, li la pass son tan pou dir : « Tout va très bien, madame la marquise ! »... Li la bour sontèt dann galé, konm l’Autruche, pou li pa oir danzé. Lèr-la, tangaz l’apré pété épi, la Frans lé pa paré pou protèz ali kont sa ! ké ou vé, ké ou vé pa dann fin fon out gafourn.

Justin