Fèb rant fèb, moun o flan pou moun oki.

Prézidan La Frans la parti an vakans. I prétan li la parti pass son vakans dann in vilaz pou bann miliardèr. Avan li sava, li la lès anou in bon nouvèl : li la di, i sa fé in zèss pou bann moun nana la maladi Alzeimer épi sak nana kansèr. D’apré li, li va trouv ui san sinkante milion l’euro pou lé dé kalité d’malad pou fé in progré pou soign z’ot maladi.
Sa in bon nouvèl, pou vréman.
Kan moin la antann sa, moin la di : lé ga ! lo prézidan nora poin difikilté pou trouv so larzan-la, dann posh bann moun nana lo pourkoi an gaspiy. Lé fasil tir so larzan-la dsi banna : dizon sé konm si i ramas lékime dsi la mèr, sé konm si zot i mète in pti pé z’ot larzann ’posh dann laksion himanitèr ! Dann l’irne la solidarité !
Oté, Justin, out tète lé fatigué koman, don ? ou kalkil sa dmoun konm ou ?Fé pèye bann rish ? I mank pièss dann out tète !
Non la pa bann rish i sar pèy so larzan-la ! Bann fèb, i sa pèy pou bann fèb ! Bann moun malad pou bann moun malad ! Dizon, nout prézidan, i invante in nouvo solidarité.

Justin