Dan la somenn in sè léta-mazor la parti fèr in diskour pou soulèv inlyèv-antouléka mi panss sé sak li la fé-kan li la di bann franssé la pa anvi pèrde zot bann zanfan… Mi koné pa si zot la déza vi demoune i yèm pèrde zot zanfan, antouléka mwin pèrsonèlman mwin la zamé antann demoune ni dir, ni souète in n’afèr konmsa.

Si zot la déza antann sa sé ké ni frékante pa lo mèm moune antouléka kké Macron, sa lé sir é sèrtin. A ! biensir si ba, nai frékante demoune i gingn zot milyar dann la vante bann zarm i étoneré pa mwin ké banna i panss zanfan lé z’ot i doi mor dan la guèr é anpliss zot i doizète kontan dsa.

Lé vré, néna in patoi i di, sak i vé la pé i prépar la guèr, mé la nou lé loinn dsa. Nou néna afèr avèk in bann i vé prépar la guèr pou gonf zot pla é la guèr zot i anonss v’ariv par-la l’ané 2030 ; toute fasson bann kapitaliss la guèr la touzour vouli ramass larzan é pa plisské sa.

Astèr par rapor l’outre-mèr fitintan l’avé in tour oméga laba SIN-Pol ziss de koi atir la guèr nikléèr dsi nout péi. Astèr i anonss anou in baz miltèr avèk sink sand solda pou komanssé é ni koné pal o rèst… Olèrk rode in vré plan pou la pé dsi la tèr é issi galman.

Akoz prézidan-la i parl pan ou plito l’osséan indien zone de pé ? Akoz li parl pa nou dévlopman, otonomi alimantèr, é toute sak in pèp normal dann in péi normal i vé. Mé pou sak i koné pa bien listoir La Franss mi rapèl azot l’ané 1870 lo miniss la Guèr l’avé di i mank pa in sèl bouton dsi la vèst bann solda é lo rézilta zot i koné ;

A bon antandèr salu !

Justin