Mé l’avé sirtou lo problèm sékirité… Si mi tronpe lo Wuambushu — tyé sète blèss katorz — l’avé konm poinn vizé ramenn lo kalm dann in péi gran konm dë komine la Rényon avèk son bann zobzéktif : si ladan na poin le lobzéktif sékirité, mi mète mon tète a koupé… Mi di sa pars mwin la konm antande dann télé Mayotte, lo Wuambushu na poin arien a oir avèk la sékirité konm lo problèm i poz zordi. Alé oir kan la komanssé lo lopérassion Wuambushu nou téi antann arienk sa dann la bouh bann zélu, dann sète sak i apèl lé fors viv, épi dann la bèk lo préfé : ramenn la sékirité é pou sa koupe shomin bann kwassa-kwassa san soussyé la sékirité bann demoune noiyé an kantité dan loséan, kass bann bidonvil — mé zordi néna ankor bann nouvo kan demoune so kou issi i sorte dann déssèrtin péi l’Afrik.

Zordi ni antann bann fors viv, épi bann zélu apré réklame la sékirité ankor é touzour, mé gouvèrnman i diré li vien pa bou fé sa li ; lé vré li la doub lo nonm poliss avèk zandarm mé bann fors viv épi ban zéli i kroi pa gouvèrnman néna in plan i kroi pa li pé ramenn la sékirité. I kroi mèm pa li vé ramenn la sékirité.

Mwin pèrsonèlman mi koné mèm pa koman Mayotte lé déviré, mé sak mi antan sé ké la sékirité banna i vé zot lé ankor loin pou gagné. Zordi toute lé kaziman fèrmé laba é bann fors viv i atann k’i nome in miniss pou zot diskite avèk li — rante parantèz pou sèye obliz ali aplike in plan ké zot la poin — mé alé savoir pou kossa si la fini dézign in gouvèrnman kroupion, la pankor nome bann miniss délégué. Mi koné pa kossa zot i panss mé mwin néna konm dan l’idé lo vèr lé dann lo frui laba dan Paris, pou Mayotte konm pou la répiblik èl mèm pou bann éritoir l’outre-mèr.

A bon antandèr salu !

Justin