Médam zé méssyé, la sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami souvan-défoi , mèm dann bande kozman néna plissk’in trass rassist. Sé pou sa i ariv amwin d’évite site tèl sansa tèl kozman. Dann provèrb mwin la marke anlèr-la i di « la gal shinoi » alor zot i konpran pou kossa mwin la transform ali an péi déor pé.

Mé sa i anpèsh pa nou kalkil lo sanss bande pti parol-la é pou mon par mi note sa sé in linvitassion pou ète passyan, pou pran passyans. Mé konm zot lé bien vèrssé dann la kiltir kréol lé sir zot la panss in n’ot provèrb i i konmsa : « La passyanss i guéri la gal ».

Dizon la passyanss sé in bon médikaman, vi ké li pé mèm guéri la gal alé oir lontan demoune té anpoizoné avèk bande pti bébète-la é par dsi lo marshé sa lé kontazyé. La gal sé la gal, mé nou l’apré diskite dsi la passyans.

Alor mi kite azot rofléshi la dsi é ni artrouv pli d’van, sipétadyé.