Kosa zot i diré d’in sosyété konmsa ? Sé in sosyété solid d’apré zot sansa non ? Ni pé pran légzanp in ménaz é néna konmsa. Sa i dispite pou in oui, pou in non, sa i lèv la gèr shakinstan épi alé savoir pou kosa, i arète la gèr pou arkomans la pé. Moin pèrsonèl, mi pans pa sa in tik-tak i sava dir lontan. Pou désèrtin, d’apré sak i di, in bon dispite i ranfors la pé dann ménaz. Kisa néna rézon ? Parl fète mi koné pa é konm mi di souvan sé solon lé ka. Néna désèrtin ménaz la dispite tout zot vi san kasé mé néna d’ot galman la kass par bout é la pa dir lontan. A bien kalkilé, si bann pèryod la pé i goumant, i pé z’ète bon. Mé si sé lo bann pèryod la gèr k’i goumant, momandoné la gèr va dir toultan é i arète ar pi. Mi rapèl in l’antropriz l’avé dë dirizan : pou in oui, pou in non, inn téi déklar la gèr l’ot. L’èrla bann travayèr téi di sa sé in n’afèr i sava pa dir lontan. Ziska k’in zour l’antropriz la fèrmé. Shak dirizan la parti son koté, é bann travayèr la rèss atèr. Alé ! Mi kite azot rofléshi la dsi é ni artrouv pli d’van. Sipétadyé !