Zot la déza antann parlé la Troïka ? Nana troi zafèr la-dan. Na touzour troi zafèr dann in Toïka, é sak mi vé anparl azot zordi, sé in spès komisyon i suiv tout bann péi dan la difikilté l’ékonomi. Donk pa sito in péi l’Erop la domann l’arzan pou anprété, é si lo péi i doi l’arzan plis ki an-fo, ala zot la. Ala ké zot i mèt zot né dan la kontabilité lo péi. Ala k’zot i domann diminyé tèl bidzé, goumant in n’ot... Boudikont, sé zot i komann lo péi. Kan zot la fine dikt zot loi, gouvèrnman lo péi, i fo li aksàp sa, sansa sintir.

Dan la Troïka-la nana lo FMI, nana la Komisyon éropéenn, épi la BCE. Banna, ziska zordi, i koné arienk in loi, diminyé la dèt. Zot i koné pa la rolans l’ékonomi. Zot i koné pa non pli désèr in pé la sintir in péi l’apré gingn in l’étrangléman. Tazantan, zot i fé sanblan larg in pti kou, apré i arsèr lo sintir pou mèt lo péi, plizanplis, dann malizé. L’èr-la zot i domann koup par isi, transhé par la-ba, goumant z’inpo, diminyé bann saler, étsétéra-étsétéra, la ké lo ra. I koup partou !
Solman, na in séktèr la pa koupé dan la Grèce, sé dann bidzé la Défans. Poitan, in moun normal noré di, la-dan an promyé i fo koupé. Bin akoz la pa toushé, akoz, konm i di, l’ostérité i toush pa bidzé-la ? In drol zafèr sa.

Drol konm pa ! Pou kosa ? Pars lo pli gro vandèr lé z’arm èk la Grèce, sé l’Almagne. Madam Merkèl i vé pa i toush sa, donk i diminyé pa bidzé la Défans. Dézyèm gro vandèr, la France biensir, é Nicolas i vé pa i toush bidzé-la ; konm in pé i di Merkozi, sansa Serkèl la ankor sévi.

 Justin