Si zot la suiv do pré lo l’aktyalité, moin lé sir nana in n’afèr la shok azot é plisk’in pé. Mi koné pa si sé arienk koméla i dékouv lo potoroz, sansa si de toutan la fine dékouv lo potoroz, é konm i di souvan défoi la pa fé in kont sanmsa.

Kosa mi vé anparlé moin la ? Mi vé anparl lo bann z’atak bann prédatèr séksyèl dsi bann madam. Kisa par ébzanp ? Dabor dann sinéma, dann la politik, shé bann z’aktèr kiltirèl : mi vé pa anparl bann z’amatèr, mé sirtou bann profésyonèl i manyé milyon par dsi milyon... lé vré, ou i antann parl dé sa an plézantan é si tèlman i plézant ou i di sa la pa vré. Sa la pa sèryé ! Sa lé égzazéré é pliské.

Ou lé plis k’étoné pars sa i date pa d’yèr, bann madam dann l’érop la fé z’ot révolisyon é sirtou ou i pé dir banna i sava pa avèk lo do in pti kiyèr, mèm zot i tap lo pli for posib. Si zot i tap lo pli for posib é si konm k’i diré na poin bononm pou fé pèr azot, bin alor, koman in bann arsélèr la nyabou pass par maye.

Si zot la bien ékout bann nouvèl dann zournal zot la rann azot kont in gro poursantaz madam la gingn z’avans zot téi vé pa, laté blizé siport bann goujatri désèrtin sovaz, é anplis ké sa pou tourn kisoi dann in pyès téat, kisoi dann in fime lété blizé siport bann z’afèr lé pa siportab.

Astèr moin lé a d’mandé pou kosa, komansa, bann minis fam, bann militan fam, bien instalé dan a plas la pa nyabou fé gran shoz kisoi pou modifyé la loi, kisoi pou dirsir la loi, kisoi ankor pou roganiz in sirvéyans bann arsélèr. Tèl fason k’i mète in frin pou lo arsèlman bann madam par bann bononm.

An tou lé ka, mi pans i fo fé l’invantèr bann krime, sansa bann déli konmsa, é omoins ariv a mète in frin avèk tousa. Amoins ké bann arsélèr lé roganizé vèy pa koman, épi zot i mine ziska dann kouloir lo pouvoir, é si sa lé vré, na konm in grann guèr pou améné.