Mi an souvien d’in tan, kan Israèl té an-nuiyé avèk lo Fatah, lo prézidan Arafat, li la mont in kont-parti té apèl lo Hamas é avèk sa li téi kroi li nora touf lo Fatah-diviz pou régné. Mank de po, lo hamas la vni son poil-a-graté é I pass pa inn ané sank ké lé dé I fé la guèr inn-a-l’ot. I fo di rosi, Israèl i anserv kalité métod i pé mérit ali, in zour, in prosé pou krime kont l’imanité. Moin la pa in éspésyalis la késtyon é bien antandi, mi vann konm moin l’ashté.

Bann péi l’oksidan, La frans dann ta, in zour, la désid ranvèrs lo prézidan Assad la-ba dann la Syrie pars lo boug sé in diktatèr, é ké li fé déga dann son pèp. Mi pans plito pars li lé z’ami avèk La Rissi, épi l’Iran é l’Iran s élo zènmi mortèl pou Israèl. L’èrla bann péi l’oksidan la désid ède tout bann z’advèrsèr Assad, sak zot i apèl bann modéré, mé galman bann l’organizasyon téroris konm Al-Kaïda épi d’ot ankor. Momandoné la énète in mouvman pli dir ankor ké Al-Kaïda i apèl Daesh é li la fé sak li apèl l’éta Islamik . In mouvman barbar épi kriyèl kosa lé rar mé la pa anpèsh bnan z’oksidanto pou ède ali, sansa in n’ot mouvman téroris libané lé alyansé sanm li.

Ala ké l’oksidan i an apèrsoi mouvman-la lé pa z’ami avèk li é konm pou lo Hamas avèk Israèl, l’ariv ‘èrpou bobnbard lo zanien z’ami. Pou fé sanblan sof kan la Rissi la rant dan ron éla bonbard vèr-é-sèk… Konm l’EI la komans san l’ail, ala ké li la révèy son bann sélil dormant é li la roganiz z’atanta dann La frans, dann la Tirki, dann l’ézypt, dann l’Ind épi in pé partou ; konm de koi lo kontrofé mla pa marshé ankor in kou. Lamoral l’istoir : i f opa konfonn in shann batay avèk in karo d’kann. Dann karo d’kann lo kontro-fé i marsh mé pa dann shann batay.