Sirtou si la bézoin fé zékonomi dsi kouran é si gouvèrnman i obliz mète lo kirsèr la tanpératir dsi « fèr tré sho ». Antouléka, d’apré sak mi oi la plipar d’moune dann bande péi rish i sava gingn kou d’sho dan l’été, kou d’froi dann l’ivèr.

Tèl androi ni oi la fé 48 dégré, tèl landroi 40 à monté, i paré dann déssèrtin koin va trape sinkante. Antouléka, sak lé sir, séké dsi la tèr, dann lémisfèr nor, lo mond é mèm lo mond rish la pa pran prékossion poitan sète istoir d’fé sho, sa lé anonssé dopi in bon boute tan.

Sa sé pou dmoune dann nor… é nou alor, nou bande sidist mi pans pa nou lé égzan antouléka d’issi pa lontan. Mézami zot va dir mwin lé touzour apré rode lo boute. Poitan non, mi rode pa lo boute, mi rogarde solman sak i éspass dann nout péi épi lé zalantour.

Mi koné déssèrtin lékol marmaye i travaye kaziman pa lo la prémidi pars i fé sho ; mi koné déssèrtènn famiye kan bande moune azé i domande rouv la klime, i réponde azot : « Kissa i sa pèye kouran ? », sansa « i fo fé avèk »… Donk nou ossi nou lé pa paré pou fèr fass la kanikil alor kossa v’arivé ? Nou va sibir ? Nou va fé avèk ? Nou va fé konm i gingn ?

Si lé pa tro tar pou fé in plan fé-sho, lé bien tar é mwin la bien pèr ni sava trinké.

A bon antandèr, salu !

Justin