Na désèrtin i di konmsa, la politik, sa i intérès pi pèrsone. Na désèrtin i bat tanbour dann radyo pou di sa. Poitan, kan na in kanpagn i vo vréman lo kou, demoun i intérès. Alé solman in kou dann rényon Gironcel, in gran rényon konm in rényon dann kartyé, zot va oir si demoun i intérès pa. Alé solman agard bann foto dann zournal “Témoignages” dsi internet... lé vré, nout péi lé pti é nana in gran kantité d’moun, donk lé posib nana in bonpé d’moun i okip pa la politik, mé na in bon kantité galman i okip la politik, i intérès la politik. Sa lé sir !
Kan z’éléksyon sar fini, sar tan pou bien réfléshi la dsi… mé i pé déza di, kan la politik i poz késtyon sèryé, na in bonpé d’moun i tourn pa lo do avèk li. Sirtou si i réponn sèryèzman bann késtyon sèryé, konm nout parti i fé Sint-Sizane dépi la kanpagn la komansé. Konm bann kolistyé Maurice Gironcel i fé. In l’égzanp ? Lo réspé la parol doné.
Sa lé inportan, pars sa i angaz anou, nout tout, dan nout vi tou lé zour. Bien antandi, ni vé pa done in post inportan in moun i réspèk pa la parol doné. In késtyonn konfyans !
In dézyèm l’égzanp ? La rézistans kont l’inzistis. Sa in késtyon sèryé pars sa in prinsip, souvan défoi, la sov nout pèp dan nout l’istoir. La pa zordi, la pa yèr, nout pèp la rézisté kont l’inzistis épi la dominasyon. Li la rézist kont l’ésklavaz ! Li la rézist kont sistèm z’angazé ! Li a rézist kont la dominasyon kolonyal ! Li la rézist kont la frod épi in bonpé tablatir ankor !
In troizyèm l’égzanp ? In vi kominal dan la pé ? Mi pans, sa in n’afèr demoun i vé. La traïzon ? Sa demoun i èm pa. Lo dézord ? Sa osi demoun i èm pa... L’èr-la, si bann késtyon konmsa lé pozé, plis d’ot ankor konm la solidarité, lo droi an avoir in travay, in lozman, in déplasman fasil, in bon l’ékol pou bann marmay, demoun i intérès pars sé zot vi épi zot i pé pa tourn lo do avèk zot vi.
Boudikont, demoun i suiv la politik, si i amèn la politik sèryèzman !

 Justin