Mi pans zot konm moin, nou la fine antann kozman-la pars mèm si sa in provèrb komor sé in kroiyans demoun in pé tout péi-demoun La Rényon galman. Sak moin la romarké sé ké pou bann famiy lé inportan donn in boushé manzé lo vizitèr. Mi rapèl, kan mon famiy la rant dann in kaz, in ramasèr boutèye la pasé é mon bèl mèr té la, la di anou, i fo sèrv in zasyète manzé lo boug pars d’apré èl té in sign é in bon sign. Nou la fé konmsa é si pou moin té pa tro inportan-in boushé manzé sé in boushé manzé !- pou mon bèl famity sa lété kékshoz sèryé. Mi pé dmann amoin kosa noré spassé si lo ramasèr boutèye té i pass dovan la kaz in rish apré rant dann in kaz. Pé sfèr li noré pa gingn in boushé manzé ! O fon, mi koné pa bien, mé mi mazine pou in famiy rish, friké, manzé lé konm i pé sogondèr an touléka lo partaz i fé solman rant famiy. Alé ! Mi kite azot rofléshi la dsi é ni artrouv pli d’van. Sipétadyé !