In moun i suiv in pé laktialité dan la Frans, kansréti dann zournal télé, kansréti dann zournal papié, i pé pa trouv normal koman bann gouvèrnman la droit i prétan la plipar d’tan zot l’apré fé lo réform di sièk dann tout zafèr.

So kou issi, lé dsi la késtion rotrèt... Lané 2003, François Fillon, rousté vèy pa koman, akoz li té i sort pèrd son plas minist, i di : na rienk in n’afèr d’bon gouvèrnman la fé, sé lo réform bann rotrèt. Biensir, té li lavé fé ! Ala lané 2007, i vé arfé in nouvo réform, akoz i di lo bann rotrété la pa trété parèy, épi in pé - bann rézime éspésial - i travay moin lontan épi i gingn tro par raport lé z’ot.

Donkalor, bann travayèr i oi gouvèrnman i rod dégonf zot pla, la mète atèr, épi bann télé la tonm sü zot do akoz, soidizan, zot lé privilézié, épi tout bann privilézié pou vréman la tonm sü zo galman.

In bann tète vid la bate la min pou lo gouvèrnman, akoz li sava règ lo problèm pou toultan.
Ankor in kou ? Bin oui ! ziska la proshène foi. Ankor in réform définitif bien sir ! Bien antandi, sü l’do bann travayèr.

Justin