L’ané 1965, l’Anglétèr i déside tir bann z’il Chagos sou la koup l’Il Maurice. Li déside galman tir bann z’il Aldabra, Farquhar épi Desroches* sou la koup Seychelles pou form le BIOT (Téritoir britanik l’oséan indien). L’ané 1968, lo 12 mars, Maurice i gingn son l’indépandans. Le boug la gingn l’indépandans ? Sé Méssyé Seewosagur Ramgoolam. La-ba, dann son péi, i di li sé lo papa l’indépandans.
Solman, si li sé lo papa l’indépandans Maurice, li sé osi lo boug la larg a-tèr bann z’il Chagos épi bann Chagossien. Pars li la aksèp larg bann z’il Chagos par raport ké sansa zamé l’Anglétèr nora aksèp l’indépandans Maurice. Sirtou san fé in référandome l’opozisyon té i réklam, pars lo rézilta lété pa gagné par avans. Sé sak Profésèr André Oraison i di dann son konférans li fé in pé partou dann La Rényon. Zordi, plizanplis so manyèr rakont l’istoir i aparète dan la klarté.
Pa pli loin k’na dé somènn, na in méssyé i apèl Jean-Claude de Lestrac, in l’ansien minis z’Afèr z’étranj dann in gouvèrnman morisien, in pèrsonalité koni dann son péi, i rakont, dann in l’interview li la done zournal “l’Express”, ké lo gouvèrnman Ramgoolam, dann tan-la la négosyé l’indépandans é, solon li, l’ot la vann Chagos bann z’Anglé. Épi, gouvèrnman morisien té i pé pa gnor sak té i sar éspasé aprésa. Té i pé pa gnor bann z’Amérikin té i sar fé in baz militèr dann Diégo Garcia… épi, ni pé dir osi, lo bann konsékans pou bann Chagossien, viktime in krime kont l’imanité.
Dann Nouvo Téstaman, nana in boug i apèl Pilate i di konmsa : kan bann Zuif i déside fé tyé lo Krist, moin lé inosan lo san boug-la. Demoun i di pli souvan, Pilate la anlav son min. Donkalor, tout sak la éspas pou bann z’il Chagos é pou bann Chagossien sé par l’Anglétèr biensir, sé par l’Amérik, nou lé dakor, mé pa solman.

Justin

* L’ané 1976, Seychelles i gingn l’indépandans épi l’Anglétèr i rann lo péi Aldabra, Farquhar épi Desroches.