Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, ou la zamé antann i di avèk in n’afèr i sar pa la boutik, in n’afèr konm in mèrsi, mé na poin arienk sa. In l’égzanp ? La kiltir. Ou i kroi i sava la boutik avèk sa ? Mi pans ke non ! Ou i kroi ké nana pou manzé-boir la-dan ? Moin lé sir ké non ! Alé oir in bon l’amizman, sa oui, sa i done aou l’anvi viv dann in bèl vi. Lé vré i sava pa la boutik èk sa mé sa i ansèrv kékshoz. Alé oir, la kiltir ? Sa i ansèrv de riyin ditou. Tok ! Pran sa pou toué !

Justin la fé pou répons :

Mon vyé matant k’i koz touzour la boush rouvèr. Sak lé bien dann out bann kozman sé ké moin lé sir moin la pa dakor avèk ou é san pour san. Pou kosa ? Pars sinploman la kiltir sa lé konpri dann la vi in pèp. Kosa par ébzanp ? Nout manyèr viv, nout valèr, nout manyèr kui manzé, la valèr ké ni donn lo bann shoz… Arzout ankor késhoz inportan sak i fé ké nou sé in pèp ou bien nou lé pa : lo santiman ni apartien in pèp, ni apartien in péi. Sa sé pa in n’afèr, ni vé osinonsa ni vé pa, sa sé in n’afèr lé an nou, in poin sé tou !

Lindi soir na in dalon la rapèl anou-nou été an parmi soir-la !- lo tan la-ba dann Kuba, toudinkou lo péi la artrouv ali an gran difikilté pars son soutien l’URSS la grinn konm in shato la sab. Pi d’pétrol, pi d’moiyin vann lo sik kann, kouran rar konm korn lapin. Lo komité santral parti kominis i réini pou trouv la parade, in tan l’Amèrik té i karsèr lo péi pou fé krèv ali. Tout bann dirizan la fé l’analiz la sityasion : in sityasion dézéspéré ! ziska ké Fidel Castro i di : nou va ansort anou par la kiltir é sé par la kiltir ké nou va sov anou. Sé konmsa ké zordi ankor Kuba lé bien vivan é lo pèp i marsh dobout malgré tout sak i mank ali. Pa In pèp katpaté ni alonzé dovan lo dominan, mé in pèp dobout.

Donk matant, la kiltir i ansèrv pa arien ? An kontrèr na poin arien k’i ansèrv plis ké sa ! Sé lo prinsipal, lé z’ot afèr i vien an plis. Tok ! Pran sa pou ou !