Pou kossa ?

Lé vré noute zansète étan zésklav sansa zangajé téi manj pa dori mé té i manj galète maniok - kassav konm téi di sa — é an pliss ké sa lo bande kassav lété movèz kalité. Défoi lo manioc li mèm té in pé amèr é noute zansète té pa tro kontan manz in nouritir movèz kalité.

Donk mwin la parti dsu linternet é sak mwin la vi lété ké noute bande ravaz sé in bon nouritir : i pé manz son fèye konm brède, son rassine avèk dosik, sansa sèl, la grèss, poiv, an frite, an gato épi ankor an d’ote afèr. Anpliss ké sa li manke pa l’amidon, vitamine épi dé shoz lé bon pou lo kor.

Biensir alé pa manz maniok amèr pars lé pa bon pou la santé sof si wi sava prépar ali konm dann déssèrtin péi l’Afrik banna i koné fé. mi panss pa ni koné fé sa issi pou noute par.

Bien antandi, shakinn i manz sak li yème : sak i manz ri bio, li manz ri bio, si li vé manz ri blan li manz ri blan, si li yèm dopin maniok akoz pa… si son bondyé sé maniok o sik manz ali, si li profèr maniok o sèl manz ali. Antouléka la pwin la diktatir la dsu é sirtou na poin pou artourn an aryèr.

Provi ké ni trape nout lotosifizanss alimantèr oboudikonte. A bon antandèr, salu.

Justin